Ábyrgar fjárfestingar og umhverfismál skipta sjóðinn miklu máli
Birta á aðild að reglum Sameinuðu þjóðanna um ábyrgar fjárfestingar, (UN Principles for Responsible Investment). Þar með skuldbindur lífeyrissjóðurinn sig til þess að líta til þátta er varða umhverfi, samfélag og stjórnarhætti í fjárfestingum sínum.
Ársskýrsla Birtu er í annað sinn sett upp og útfærð í samræmi við GRI-staðla, Global Reporting Initiative Standards. Kjarni máls er að greina frá hefðbundnum rekstri lífeyrissjóðsins annars vegar en að fjalla hins vegar um áhrif starfsemi hans á efnahag , umhverfi og samfélagið og hvaða mælanleg markmið hafa verið sett í því sambandi.
Samfélagsábyrgð tekur til dæmis til viðskiptasiðferðis, umhverfismála í víðum skilningi, vinnuverndar og mannréttinda. Umfjöllun og upplýsingar þar að lútandi eiga að vera aðgengilegar sjóðfélögum og öllum almenningi eftir atvikum.
Ábyrgð gagnvart samfélaginu er þáttur sem stofnanafjárfestar verða að taka alvarlega, þar með taldir lífeyrissjóðir sem og eigendur og stjórnendur fyrirtækja.
Umhverfis- og loftlagsmál eiga að vera ofarlega í mati á fjárfestingum hérlendis og erlendis og eru það í reynd. Þegar nú blasir við að lífeyrissjóðir fjárfesta og ávaxta fjármuni erlendis í vaxandi mæli verða þeir jafnframt að afla sér og hafa aðgang að þekkingu til að geta sett fjárfestingarkosti í samhengi við ábyrga stefnu og gjörðir í umhverfis- og loftlagsmálum.
Birta lífeyrissjóður vinnur að því að innleiða Heimsmarkmið Sameinuðu þjóðanna um sjálfbæra þróun í starfsemi sinni, umfangsmestu markmið sem ríki heims hafa komið sér saman um.
Birta lífeyrissjóður setur sér að stuðla að sjálfbærri þróun í samfélaginu með góðum stjórnarháttum og ábyrgum fjárfestingum.
